অন্য এক উগ্ৰপন্থী, অন্য এখন যুদ্ধ

সন্ত্ৰাসবাদে সমাজত অশান্তিৰ সৃষ্টি কৰে , কিন্তু সন্ত্ৰাসবাদ যেতিয়া বছৰৰ পিছত বছৰ অবিৰত ভাৱে চলে, ই সমাজক ধ্বংস  কৰে । এছিয়াৰ মধ্য আৰু পূব অঞ্চলৰ বহুকেইখন দেশ বছৰ বছৰ ধৰি এনে যুঁজ-বাগৰ , বোমা-বাৰুদ আৰু হত্যা  সন্ত্ৰাসৰ জুয়ে আগুৰি ৰাখিছে । কেতিয়াবা জিহাদৰ গয়না লৈ, কেতিয়াবা প্ৰাচ্ছাত্য অগ্ৰাধিকাৰৰ গয়না লৈ যুঁজাই যুঁজি আছে, মাৰিব পৰাবোৰে মাৰি আছে, মাৰিব নোৱাৰাবোৰ মৰিয়েই আছে । মুঠতে এক অশান্তিময় পৰিৱেশ  দীৰ্ঘ্দিন ধৰি বিৰাজমান হৈ আছে । প্ৰায়ে বাতৰি কাকতত আৰু টিভিৰ মাধ্যমেৰে  আত্মঘাতী বোমা, আমেৰিকান - ব্ৰিটিছ সাংবাদিকক হত্যা কৰি পঠিওৱা ভিডিঅ' , গাজা ষ্ট্ৰিপৰ ধ্বংসস্তুপৰ ফটো , অবিৰতভাৱে চলি থকা গুলীবৰ্ষণৰ দৃশ্য দেখি আহিছো । এনেকুৱা এক ছন্দত এইবোৰ চলি থকা যেন অনুভৱ হয়  যেন কেতিয়াও ধ্বংসলীলা শেষ নহ'ব  । ঠিক কিবা এক চাবি পকোৱা হাত ঘড়ীটোৰ নিচিনা লাগে । ৰাতিপুৱাই চাবি পকাই দিলো ,  দিনটো ঘড়ীটো ঠিকেই চলি থাকিল , পিছৰদিনা ৰাতিপুৱা আকৌ চব্বিশ ঘণ্টা চলিব পৰাকৈ ঘড়ীৰ চাবিটো পকাই দিলো । মুঠতে সন্ত্ৰাসবাদৰ ঘড়ীটো ৰখাৰ নাম নোলোৱা হ'ল । কোনোবাই কয় চাবিটো পকোৱাৰ আৰত সদায় আমেৰিকা-ৰাছিয়াৰ দৰে দেশৰ  তেল-পিপাষু ৰাজনীতি কিবা নহয় কিবা প্ৰকাৰে জড়িত , কোনোবাই কয়  এয়া মুষ্টিমেয় ক্ষমতালোভী সন্ত্ৰাসবাদ  নেতাৰ ক্ষমতা দখলৰ খেল ।  যদিও খবৰবোৰ শুনি থাকো বা দেখি থাকো , খবৰৰ আঁৰৰ আচল ৰহস্যবিলাক জনাটো বা বুজাটো আমাৰ দৰে সাধাৰণ মানুহৰ বাবে অসম্ভৱ । কিন্তু আমাৰ মগজুৱে ঢুকি পোৱাখিনিয়ে কয় , কোনোবা নহয় কোনোবাই সেই সন্ত্ৰাসৰ হাতঘড়ীটোৰ চাবিটো পকাই অহাৰ দায়িত্বসুচাৰুৰূপে পালন কৰি আহিছে , সেইটো ধুৰূপ । 

                   ১৯৯০ দশকৰ আৰম্ভণিৰ পৰা প্ৰায় ২০০৭-০৮ চন মানলৈ  আল-কায়্দা নামৰ উগ্ৰপন্থী সংগঠনটোৱে ভয়ানকভাৱে এই চাবি পকাই অহা কামটো কৰি আহিছিল । আল-কায়্দাৰ সন্ত্ৰাসৰ গ্ৰাফডাল ২০০১ চনত আমেৰিকাৰ অভিশপ্ত আক্ৰমণৰ সময়ত শীৰ্ষত আছিল । আমেৰিকাৰ চৰকাৰ আৰু সৈন্যবাহিনীৰ নেৰানেপেৰা চেষ্টৰ ফলত আল-কায়দাৰ ভয়াবহতা ক্ৰমাগত ভাৱে কমি আহিল । বিন্-লাডেনৰ মৃত্যুৰ পাছত   লাহে লাহে আল-কায়্দাৰ পৰা চাবি পকোৱাৰ দায়িত্বটোত অন্য কিছুমান সন্ত্ৰাসবাদী গোটে আগভাগ লৈছে । আইছিছ , ব'ক' হাৰাম , হক্কানী নেটৱৰ্ক , হেজবোল্লাহ আদিয়ে প্ৰতিদিনে ধ্বংসযজ্ঞ অব্যাহত ৰাখিছে । যিকোনো দিনতে বাতৰিৰ শিৰোনামাত এইবোৰ সন্ত্ৰাসবাদী সংগঠনৰ কিবা নহয় কিবা এটা খবৰ থাকিবই , - আজি বোলে গাজা ষ্ট্ৰিপত আইছিছে দুই শতাধিক লোকক মাৰিলে , ব'ক' হাৰামৰ এদিনতে এহেজাৰ দুহেজাৰ মানুকক হত্যা , হক্কানীৰ আত্মঘাতী বোমা বিস্ফোৰণ ইত্যাদি আতংকৰ খবৰ । অকল মধ্য-পূব এছিয়াতেইনে , ইহতে লণ্ডন, পেৰিছ ,কেনিয়া, নাইজেৰিয়া ইত্যাদি দেশতো বিষ বিয়পাইছে । আজিৰ দিনত , এছিয়াৰ বাবে সকলোতকৈ ভয়াৱহ হৈ উঠিছে আইছিছ বা ডাইছ বা আইছিল নামেৰে জনাজাত সংগঠনটো ।

                        এজন স্বয়ম্ভু খলিফাৰ নেতৃত্বত চালিত এই আইছিছে  ইৰাক , ছিৰিয়া , লেবানন আদি দেশত চহৰৰ পিছত চহৰ নিজৰ অধীন কৰিছে , হাজাৰ হাজাৰ  মানুহ মৰিছে , শই শই ঘৰ ভাঙিছে । হতাশাজনক ভাৱে যিমানেই সন্ত্ৰাসৰ দিন আগুৱাই গৈছে , তিমানেই আইছিছৰ দৰে সন্ত্ৰাসবাদী সংগথনৰ সদস্যৰ সংখ্যা বাঢ়ি গৈছে । বিশ্বৰ বহুঅকেইখন দেশ আগুৰি এক সাম্ৰাজ্যত একছত্ৰী শাসন চলোৱাৰ সপোন দেখা আইছিছৰ নেতাসকলৰ প্ৰৰোচৰনাত পৰি  বিভিন্ন প্ৰান্তৰ বহুতো যুৱকে এই সন্ত্ৰাসবাদৰ অংশীদাৰ হবলৈ ইৰাক, ছিৰিয়া পাইছেগৈ । আমেৰিকা, ব্ৰিটেইন আদি দেশতো বাদেই আমাৰ দেশৰো বহুতো যুৱক আইছিছত যোগ দিছেগৈ ।  নিতৌ নতুন সন্ত্ৰাসৰ ভিডিঅ' ওলাইছে , বাতৰি প্ৰকাশ হৈছে , নিৰাশাজনক ফটো প্ৰকাশ হৈছে , হাজাৰ হাজাৰ নিৰপৰাধ জনতাৰ হত্যা কৰা হৈছে , শই শই ঘৰ ধ্বংস হৈছে , দলে দলে যুৱক সন্ত্ৰাসবাদত যোগ দিছে , মুঠতে সন্ত্ৰাস বিয়পিছে অহৰহ ।

                 কেতিয়াবা ভাব হয় , এইযে ইখনৰ পিছত সিখন চহৰ ধূলিত পৰিণত হোৱা দেখাই আছে , টাটা মোবাইলৰ দৰে গাড়ী বিলাকত মুখত কলা কাপোৰ বান্ধি , কান্ধত ৰকেট লঞ্চাৰ , এ কে ৪৭ / ৫৬ ৰ দৰে মাৰণাস্ত্ৰ লৈ সন্ত্ৰাসবাদীবোৰ আগৰ চহৰখনলৈ ধাবমান হৈছে , সেই চহৰখনৰ মানুহবোৰে কি ভাবিছে বাৰু ? যিসকলে আগতীয়াকৈ খবৰ পাইছে , সেইসকল চাগে আগেই পলাই গৈছে কোনোবা বেলেগ নিৰাপদ ঠাইলৈ । তেনেকুৱা মাহযুদ্ধৰ মাজত নিৰাপদ বুলিতো কোনো ঠাই নাই । মানুহে যি পাৰে তাকেই লৈ প্ৰাণৰ মমতাত    নিজৰ কষ্টোপাৰ্জিত , নিজে জন্ম হোৱা , জীৱনৰ ইমান কেইটা বছৰটো পাৰ কৰা ঘৰ্-বাৰী এৰি থৈ চিন ভৱিষ্যতৰ দিশে ধাৱমান হৈছে । কিমান ভাবিছে চাগৈ ,আজি ৰাতি সেই ঘৰটো ভাঙিব নেকি , নে  ধবংসকাৰীবোৰক বাধা দিবলৈ কোনোবা আহিব নেকি ? কোনোবা ওলাবনে এই অশুভ শক্তিক মষিমূৰ কৰিব পৰা শক্তি ? আছেনে কৰবাত কোনোবা ?

                        এই হত্যালীলা ৰোধৰ কাৰণে ইৰাকী , ইৰাণী আৰু আমেৰিকাৰ সৈন্যবাহিনীয়ে বহু আগৰ পৰাই চেষ্টা চলাই আহিছে । কিন্তু , আইছিছৰ বিশালতা , অনৈতিক আৰু অমানৱীয় কাৰ্যকলাপৰ বিৰুদ্ধে জয়লাভ কৰিবলৈ এতিয়াও বহুত বাকী আছে । আইছিছৰ এই অগ্ৰাসনে  ইমানেই ভয়াবহ ৰূপ লৈছে যে  এতিয়া ইৰাকৰ অধিকাংশ , ছিৰিয়াৰ প্ৰায় অৰ্ধেক আৰু লেবাননৰ বহু কেইখন চহৰ নিজৰ অধীনত কৰিবলৈ সক্ষম হৈছে । ইয়াৰ উপৰিও আফগানিস্থান , তুৰ্কী , ইজৰাইল আদি দেশৰ সৰু বৰ চহৰত আক্ৰমণ চলায়েই আছে । যেতিয়া এই অস্থিৰতা বহুদিন ধৰি চলি আছে আৰু এছিয়াৰ বাহিৰেও আমেৰিকা আৰু ইউৰোপৰ বিভিন্ন দেশত আইছিছে বিভিন্ন কূটঘাত মূলক কাম হাতত লৈছে , বিভিন্ন দেশৰ চৰকাৰেও নিজৰ সামৰিক শক্তি এই যুদ্ধত অংশগ্ৰহণৰ বাবে আগবঢ়াইছে । অকল চৰকাৰী সামৰিক বাহিনীয়েই নহয় , কিছুমান অন্যান্য  সশস্ত্ৰ সংগঠনেও  আইছিছৰ বিৰুদ্ধে যুজি আহিছে । এই সন্মিলিত শক্তিয়ে  মাজে মাজে ইখন সিখন চহৰ সিহঁতৰ কবলৰ পৰা উদ্ধাৰ কৰিছে যদিও এতিয়াও প্ৰাণৰ মমতা লৈ পলাই যোৱা সাধাৰণ মানুহে নিজৰ ঘৰলৈ উভটি অহাৰ সাহস পোৱা নাই । আহিবই বা কেনেকৈ , এনেকুৱা অবিৰত যুঁজত সাধাৰণ মানুহক সৈন্যবাহিনীৰ ওপৰিও এজন হিৰ'ৰ বাৰুকৈয়ে প্ৰয়োজন । এনেকুৱা এজন বীৰ যি ৰাজনীতিৰ উৰ্দ্ধত, সাধাৰণ জনতাৰ মনৰ কথা যিয়ে কয় , যাৰ অভিধানত ভয়ৰ কোনো সংজ্ঞা নাই , যাৰ উপস্থিতিয়ে  তেওঁলোকক দিব পাৰে আত্মবিশ্বাস । এনেকুৱা এজান হিৰ’ইহে আইছিছৰ বিৰুদ্ধে এই যুজঁত সাধাৰণ মানুহক জীয়াই থকাৰ থল দেখুৱাব ।

               এনেকুৱা এজন হিৰ'ৰ নাম হৈছে আবু আজৰাইল । আইছিছৰ বিৰুদ্ধে যুঁজ দিয়া এক সশস্ত্ৰ সংগঠন ইমাম আলি ব্ৰিগেডৰ এজন কমাণ্ডাৰ আবু আজৰাইল । সুঠাম সবল চেহেৰাৰ অধিকাৰী আবুৰ অবৱব চাব লগীয়া , এখন হাতত অত্যাধুনিক ৰাইফল , বুলেট্প্ৰুফ জেকেটৰ পকেটত বিভিন্ন যুদ্ধৰ আনুষঙ্গিক সামগ্ৰী , ককালৰ খোচনিত ডেগাৰ , এখন হাতত কেতিয়াব কুঠাৰ , কেতিয়াবা উদত্ত তৰোৱাল , দামী দামী টি ছাৰ্ট আৰু টুপী - এক যেন ভয়ভীত নোহোৱা মৃত্যুৰ দূত । যতেই সন্ত্ৰাসবাদী আক্ৰমণৰ খবৰ শুনিছে , তাতেই প্ৰত্যাক্ৰ্মণৰ  বাবে জপিয়াই পৰিছে । সাধাৰণ মানুহৰ মাজৰ পৰা আহি আসাধাৰণ শৈলীৰে যুদ্ধ কৰা আবুক মানুহে ইতিমধ্যে মৃত্যুৰ দেৱ্দূত , ইৰাকী ৰেম্ব্' আদি নামেৰে অভিষিক্ত কৰিছে । যেনেকুৱা নাম পাইছে , তেনেকুৱা কামো কৰিছে । ধৰক ইপিনৰ পৰা আইছিছৰ সন্ত্ৰাসবাদীয়ে একেধাৰে গুলিয়াই আছে , ইৰাকী সৈন্যৰ দল এটাই খাপ পিটি প্ৰত্যাক্ৰমণ কৰিবলৈ ৰৈ আছে , সাহস পোৱা নাই । হঠাত আহি ওলাল আবু আৰু অন্যান্য ইমাম আলি ব্ৰিগেডৰ কেইজনমান সদস্য, নিৰ্ভীক ভাৱে ধাৰাষাৰ গুলীবৰ্ষণৰ বিৰুদ্ধে আগুৱাই গ'ল সমুখসমৰত , ফলাফল , ইৰাকী সৈন্য বাহিনীয়েও সাহস পাই আইছিছৰ উগ্ৰপন্হীবোৰক পিছুৱাই যাবলৈ বাধ্য কৰালে ।  কৰবাত কোনোবা চহৰত আইছিছে আক্ৰমণ কৰিব যোজা চলাইছে , খবৰ পাই নিজৰ ট্ৰাক লৈ আবু হাজিৰ , ট্ৰাকৰ ডিকিত ৰকেট লঞ্চাৰ , বন্দুক , বোমা, ডেগাৰ, তৰোৱাল  সন্নিবিষ্ট এক সম্পুৰ্ণ যুজৰ প্ৰস্তুতি । 

                প্ৰতিটো গুৰুত্বপূৰ্ণ মুহূৰ্ততেআবুৱে নিজৰ আধুনিক মোবাইলৰ পৰা ভিডিঅ' কৰিছে , তাত আইছিছৰ বিৰুদ্ধে কেনেকৈ যুঁজ কৰিছে তাৰেই প্ৰতিফলন । সাধাৰণ মানুহে অন্যায়ৰ বিৰুদ্ধে কৰা এই যুজঁৰ উমান পাব পৰাকৈ আবুৱে এইবোৰ ভিডিঅ' আপলোড কৰিছে নিজৰ ফেচবুকৰ প্ৰফাইলত , বিভিন্ন অন্যান্য মাধ্যমত । আবুৰ লাখ লাখ অনুৰাগীয়ে সেয়া চাইছে , কোনোবাই যে তেউঁলোকৰ হৈ যুজি আছে সেয়া দেখিছে , সাহস পাইছে । অকল যুঁজৰ ভিডিঅ’ই নহয় , আবু যে সাশাৰণ মানুহৰে মাজৰ এজন তাকে প্ৰকাশ কৰিবলৈ কেতিয়াবা জিমত অনুশীলন কৰি থকা ভিডিঅ' , কেতিয়াবা নিজৰ ল'ৰা-ছোৱালীৰ লগত ভিডিঅ' , কেতিয়াবা আইছিছৰ কোনোবা চহৰত সাধাৰণ মানুহে কৰা আব্দাৰৰো ভিডিঅ' দেখাইছে । অকল যুঁজ কৰাই নহয় , মানুহক সাহস দিয়াতোও এক মিছন হিছাপে  লৈছে আবু আৰু তেওঁৰ ইমাম আলি ব্ৰিগেডে । যি সময়ত আইছিছৰ এই ধ্বংসলীলা সোনকালে শেষ হ'বনে নহয় মানুহে সন্দেহ কৰিছে , যেতিয়া ইখনৰ পিছত সিখন দেশৰ বিভিন্ন উগ্ৰপন্থী সংগঠনৰ লগত সিহঁতে সহযোগিতা কৰিছে , তেনে সময়ত আবুয়ে আশ্বাস দিছে নিজৰ এক শ্লোগানৰ জৰিয়তে । আবুয়ে প্ৰচাৰ কৰিছে  "ইলা-তাহিন্" নামৰ নিজৰ এক শ্লোগান যাৰ অৰ্থ ," মাথো ধূলিহে ৰৈ যাব" । সচাকৈয়ে যেন এই অত্যাচাৰ শেষ হৈ অত্যাচাৰীসকলৰ মাথোন ধূলি ৰৈ যায় , এয়াতো সকলো সাধাৰণ জনতাৰ কামনীয় ।

                 আশ্চৰ্য জনক ভাৱে , ৪০ বছৰ বয়সীয়া , প্ৰাক্তন বিশ্ববিদ্যালয়ৰ প্ৰফেছৰ আৰু এসময়ৰ টাই-কোৱান্ডো চেম্পিয়ন , আইছিছক ধূলিলৈ পৰিৱৰ্ত্তন কৰাৰ শপত লোৱা এই আবুক আমেৰিকান প্ৰশাসনে প্ৰথমতে উগ্ৰপন্হী হিচাবে অভিষিক্ত কৰিছিল , কিন্তু সময়ৰ কালচক্ৰত পৰি এতিয়া আবুৰ ইমাম আলি ব্ৰিগেড, আমেৰিকান সৈন্য , ইৰাকী সৈন্য সকলোৱে একেলগে হাতে হাত ধৰি কাম কৰিব লগীয়া হৈছে । এতিয়া আবুক আমেৰিকা আৰু ইৰাণে উগ্ৰপন্থীৰ সলনি এক সহযোদ্ধা বুলি গণ্য কৰিছে, আৰ্থিক ভাৱেও সহায় আগবঢ়োৱাৰ কথা ওলাইছে । খাৰুৱা তেল -গেছ আৰু ক্ষমতা লাভৰ এই ভয়াবহ দিনবোৰত কোনে কি ৰাজনীতি খেলিছে বুজাটো টান ।সময়েহে ক'ব মধ্য-পূব এছিয়াৰ এই ধ্বংসলীলা কেতিয়া সমাপ্ত হ'ব , কিন্তূ এইটো নিশ্ছিত যে আবুৰ দৰে হিৰ'ৰ আবিৰ্ভাৱে লাখ লাখ সাধাৰণ মানুহৰ মনত সাহস যোগাই যাব । আমাৰ দেশতো বহু অন্যায়কামী শক্তিৰ পয়োভৰ ঘটিছে , আমাক আশ্বাস যোগাবলৈ , আমাক নিৰ্ভয় দিবলৈ , আমাক সাহস দিবলৈ এনেকুৱা কোনোবা হিৰ’ ওলাবনে ?