বিদেশী খেদা আন্দোলন – ১

“পাহাৰৰ ওপৰত বাংলাদেশীয়ে ঘৰ বান্ধিছে অই কে* ” , কোনে আহি জানো খবৰটো দিলে গম পোৱাৰ আগতেই গোটেইখন হুৱা-দুৱা লাগি গ’ল । ছেকেণ্ড ব্লকৰ বাৰাণ্ডাত কেইটামান বহি সমুহীয়া ছিগাৰেট হুপি বহি আছিল । বহি আছিল মানে নিজৰ নিজৰ টাৰ্ণ অহালৈ বাট চাই আছিল । কাৰোবাৰ পকেটৰ পৰা চিগাৰেট এটা ওলোৱাৰ উমান পোৱাৰ লগে লগে তাত উপস্থিত ৰাইজে কুইজত বাজাৰ ৰাউণ্ডৰ বাজাৰ বজোৱাৰ দৰে আৰম্ভ কৰি দিয়ে , “ ফাৰ্ষ্ট খেপ , ছেকেণ্ড খেপ ” । ছিগাৰেট হোপাৰ ক্ৰম ঠিক হৈ যোৱাৰ পিছত ওলোৱা কোনোবা এটা অত্যুতসাহীয়ে যদি ভুলতে কৈ দিয়ে ফাৰ্ষ্ট খেপ বুলি , আগৰে পৰা ছেকেণ্ড খেপৰ ল’ৰাটোৱে যিটোহে পোন্দোৱা চাৱনি দিয়ে তাৰ অৰ্থ এইটো , “বাপেৰৰ দিনত কোনোবা এটা ছিগাৰেট কিনি পাইছিলি ” । ঠিক তেনেকুৱা এটা আবেলিতেই , খুব সম্ভৱ মেছত কাম কৰা ল’ৰা জয়ন্ত বা হিতেশে এই খবৰটো দিলে ।
ইঞ্জিনীয়াৰিং কলেজৰ হোষ্টেলৰ ল’ৰাবোৰৰ কাৰণে পৰীক্ষা অহাটো কিবা এটা উতসৱৰ নিচিনাই । পূজা-পাৰ্ৱণ , বিহু ইত্যাদিত যেনেকৈ ঘৰৰ পৰিয়ালবোৰ একগোট হয় তেনেকৈ পৰীক্ষা অহাৰ সময়তহে হোষ্টেলৰ ল’ৰাবোৰ একে সময়তে হোষ্টেলত পোৱা যায় । তেনেকুৱা সময় এটাতেই এই খবৰটো আহিল , আৰু মুহুৰ্ত্ততে গোটেই হোষ্টেল আহি ছেকেণ্ড ব্লক পালেহি । হনুৰ দোকানত চাহ খাবলৈ যোৱাবোৰ তললৈ নমা বাদ দি ওপৰ পালেহি , গেম খেলি থকাবোৰ আধাতে গেম এৰি আহিল । মুঠতে গোটেইখন হূলস্থুল ।
“ক’ত বে, কোনে দেখিছে ”
“হোষ্টেলৰ পিছৰ পাহাৰখনত , বহুতকেইটা ঘৰ ।”
“ বাহিৰত লুঙী মেলি থোৱা আছে ”
ৰাইজৰ উতকণ্ঠাত বুজা গ’ল কথা গুৰুতৰ । আমাৰ হোষ্টেলৰ ওপৰত আহি বাংলাদেশীয়ে ঘৰ সাজিলে , আমি গমেই নাপাওঁ । অসমৰ মাটিত বিদেশীৰ দখল , চৰকাৰে মাত মতা নাই বুলি আমি মনে মনে থাকিমনে ?
“আমি কেইদিনমান আগতে যাওঁতে তাত একো নাছিল দেখোন বে ”, বটলে বৰ চিন্তিত ভাবে মাত লগালে । ইমান সময় কথাৰ বুজ ল’ব অহা পায়াই আৰু ৰৈ নাথাকিল , নিজৰ ৰুমৰ পৰা পুৰনি হকীষ্টিকডাল লৈ ওলাই আহিল , “ব’ল , কে* , আজি দিও বাংলাদেশীক এসেকা ” । সকলো যেন এই হুংকাৰতোলৈহে ৰৈ আছিল । যেয়ে হাতত যি পালে তাকে লৈ বিদেশী খেদা আন্দোলনলৈ বুলি আগবাঢ়িল । সৌভাগ্যবান কেইটামানেহে হকীষ্টিক , ক্ৰিকেট বেট জাতীয় সন্মানজনক হাথিয়াৰ ভাগত পালে । পিছলৈ অহাবোৰে জেওৰাখুটি , ভগা ইটাৰ টুকুৰা , জিমত পৰি থকা বেকা ৰ’ড এদাল ইত্যাদি হাতত লৈ প্ৰায় বিশ-পচিশ জনীয়া জননীৰ সন্তান , দেশপ্ৰেমীকৰ দল বিদেশী খেদা আন্দোলনলৈ বুলি আগবাঢ়িলো ।
- বিদেশী ওলোৱাটো সচানে ? যদি সচা , আমি বিদেশী খেদিব পাৰিলোনে ? আন্দোলনে কি ৰূপ ল’লে ? কাৰোবাৰ কিবা লাভ হ’লনে ? জানিবলৈ পঢ়িবলৈ নাপহৰিব পৰৱৰ্ত্তী সংখ্যা -- বিদেশী খেদা আন্দোলন ২